Kawal : Kekebalan Tubuh.

Se kawal ung nowak masama-sama situpe si pa engat-engaten ne tou nampe sia ca u menginde nginde sa tambisape sia maka lalan mande an doong nesa wo ase roong e tou walina, situpeke pakena sa u sumaru se tou ca u loor muntep an doong ena. Se ilmu kawal anio sa engaten ne tou masale ca u gampangke engaten o makere, maka keli pemuy muyen ase matua wo se walian ca u ke makasa la o wee. Se kawal anio sa se tou makere kamang o ka kereana owak na mamuali kawal sapape se mangkur o medo sia cawana se tou sumusut sia sapakem se tou sumaru sia maka resik resik mande ca ta alus sia kumeter.

Se kampetan makakila o rona mator se kawal anio in tepe maka toyo oka maka esa si inang sen maka ento ang kikina tonderukan. Pute paka kuana sa awean tou masale se kawal anio mawutul-wutul sia se tou loor, ca kapetokol wo elur sama. Makarua tampana se kawal melali, katare awean telew e matua em penimboy nimboyena wo karua yisi ase owakna. Sa seren ase karua sisilen an dangka sa u se tou makere wo yisi ase owakna kapilaan ke ca u susa taan keli ka suut suut sa sia maya wo sapape sia mange am paangeana. Makakeli pa sinou asi tou masale se kawal anio sa mindo sia wayake pakasa paken maka keli ase roong yana sumaru ato merang ase tempo na nitu. Ka taney ase taong 1600an se waraney waraney an tompaso merang sumaru se pinorongan maka tampa ase amekona kasuianke ila keli ma epes se tou ameko ase tou wo pook eta ang ratahan, belang wo tonsawang. Ase tempo nitu kelian se kawal pinake ila.

Taney I inang sen sa u mindo se kawal sia moray wo rumeindeng telu nga wengi ameina serap wangker. Ca wayake asi nitu sa ca u makere tanda o sowaten ne matua si pa pangilaan reipe kakerean ase tempo nitu situke warengen kumawes ase serap wangker akad se matua meem tandana. Sa aweanem sowat e matua se ma ampet rumeindengem wo sia tumerimam se wee I matua o weena ase puyun. Sapake si wee wuyena ase puyun o sapakem pe nimboy-nimboyena ato isina ase owak ena. Maka awes ang reindengana se tou yana lelena ase rano I kamang nampe pakasa owak marames waya kapute se tampana nitu sitenan rano mamuali kawal waya.

Awean nuwu matua eng mapake wo sekasaru se kawal anio, Sa sia mapake kawal o sia sumaru tou  sia ung kumuwa (‘sapakem se palalin wo karapi nei wayake paka kamangen ne Amang Kasuruan Wangko  ….dst.(dilarang Publish) ico cawana sapa-sapa sako makane wuana tana). Se nuwu andangka nuwu make wo sumaru se kawal anio. Se muntung wayake sila se tou sama wo elur.